كوابيس

جربت تصحى قبل كده تلاقى جسمك كله منمل وكأنك مشلول، وقلبك بيدق بسرعة جدااا أسرع من إدراكك للوقت

جربت تصحى كل ربع ساعة على نفس الحالة ولما ربنا يكرمك تبقى ساعة

جربت تصحى تلاقى نفَسك هربان منك وتدور عليه ما تلاقيهوش

جربت احساس الخوف إنك تنام وإنك تفضل صاحى

جربت احساس الإهانة لما سريرك يرفضك ويرفض إنه يشاركك ليلك أو حتى نهارك

جربت تقعد أسبوعين أو أكثر وملامحك مش بتاعتك، كل ما تبص للمرايا تحاول استعادتك بدون جدوى

جربت تبتسم مجرد ابتسامة فتحس قلبك بيتشقق

جربت تهرب لقلمك عشان تستوطن العالم التانى، عالم الكتابة فتلاقيك منفى

جربت تخبط فى سقف دنيتك فتحنى راسك تخبط فى رجلك

جربت .... جربت؟؟

دى مش حالة اكتئاب، دى محاولى وصف لحالتى لما بصحى على كابوس كل ربع ساعة مش أكثر