تجربة أولى بالعامية ... فلكل شعراء العامية رفقًا بى
بس برضه مفيش مانع تقولوا رأيكوا :)
الليل مابينتهيش
لما الشروق يسد عين الأرض
وبيفضل ساكن خلفية حياة
بنعيشها وما بتتعش
وأحلامه دايمًا مابتكملش
غير لما تكون نهايتها
سقوطك من فوق قوى
وروحك المسحوبة منك
مابترجعش
....
الليل طيب قوى
لكنه عمره ماقابل نور
فمبيعرفش غير إنه يملاك بالضلمة
ومابيبخلش
نجوم وسهر
ووحدة وخوف
وحاجات مرسومة ف حضن السما
وصوت مهزوز
صداه جواك مابيفارقكش
...
الليل صاحب حزين
مكســـور
على صاحبه الضرير ف النور
وحواديته اللى مابتخلصش
سنينه تمر
لا بيفَتح
ولا ع الضلمة يتعود
تعدى افرحة قدامه
ولايشوفها
ومنها معاد طول الوقت
مابيطلش
...
الليل صاحب وفى
شايل أسرار كتير
ومابيتعبش من حملك
ومابيزهقش
تفارقه ساعات
وهومعاك مابيفارقش
ساكن خبايا روحك
ف أنفاسك
وتفاصيلك
وبحة ف صوتك
وتنهيده ف صدرك
مابتطلعش
...
الليل خايف وحيد
ملازمك
لأنك ظله اللى ما بينطقش
No comments:
Post a Comment