ضـــل

حلمك عفى
نفض ترابك من عليه
غربل لياليك القديمه
وانتقى لحظة فرح
عديك شويه ...
بص من براك عليك ....
شايف !! عيونك مقفولين
قاصد تعيش ف الضلمه .. والليل يبلعك
الخوف وإحساس الهروب
حالة كآبه ضيقه ع الذكريات
فتح عيونك حبتين
إرغم شعاع الشمس يحضن نظرتك
مهما يصدك .. قرّبه
اشتاق للقياك من كتير
وأنت اللى ضليت الطريق .. فاستحمله
****
جربت طعم النور .. خلاص
طب رأيك إيه ؟!
أحسن تعيش وعينيك براح
ولا .. مغمض منطوى
صدقتنى .. لما نصحتك بالمحاوله
أنا كنت محتاجلك تجرب .. دلنى
إحساسك إيه ؟!
نفسى أخطى خطوتك
واتخطا كل الممنوعات
نفسى أعودمن تانى ليّا
بس شىء
زى اللى كان رابط جفونك .. بالسواد
خلانى أخاف !!!
****
يا اللى وصلت هناك
أنا يمكن أكون ناصح .. وبس
لكنى عايزك تحتضن إيدى ف إيدك
وتشدنى أوصل لحدّك أصلى تعبت من العما

محمد عزالدين